0 تصويتات
بواسطة (7.5مليون نقاط)

الحمدلله الذي تتم بنعمته الصالحات

في هذا الموضوع راح اطرح لكم تجربتي بخصوص الزواج من اجنبيه مقيمه و مولوده في المملكه. ( 2020 )اتمنى يفيدكم 

في البداية يروح الخاطب الى محافظة جدة مكانهم شارع المدينه النازل بعد شارع التحليه في جدة . يطلبهم ورقه تقديم على الزواج من اجنبيه مقيمه في السعوديه راح تعبي معلوماتك وكم راتبك وفين تشتغل و معلومات البنت من رقم اقامه و رقم شهادة الميلاد طبعا شروطهم الخاطب يكون عمره اكبر من 25 سنه و المخطوبة اكبر من 20 سنه .الطلبات اللي مطلوب انك تجيبها بعد ما تعبي الورقه اللي يعطوك اياها كالتالي :
1- معروض موجه الى صاحب السمو الملكي محافظ جده 
الخطاب تكتبه بنفسك او اذا تعرف احد يكتبه لك تذكر فيه انك تقدمت للانسه الفلانيه وتكتب الاسم رباعيا ثم جنسيتها . وتكتب مكان ولادتها وانها مقيمة مع عائلتها . وتكتب كم جمله لسمو الامير تفيد انك تقدمت لهؤلاء الناس ووجد فيهم الصلاح ومن هذا الكلام. في نهايه المعروض تكتب اسمك رباعيا و رقم هويتك و جوالك 
2- صوره من الهويه تكون واضحه 
3- صورة من دفتر العائله للمتزوجين 
4- اصل تعريف من العمل بالراتب 
5- صوره من شهادة ميلاد المخطوبة
6- صورة من اقامة المخطوبة وولي امرها
7- صورة من جواز المخطوبه وولي امرها 
8- صوره صك الطلاق للخاطب و المخطوبه ان وجد
9- اقرار من ولي امر المخطوبه بالموافقه على زواجها ويكون موقع منه

يكتب فيه ولي امر المخطوبه انه لا مانع عنده من زواج ابنته فلانه على المواطن فلان . و يكتب اسمه رباعيا ورقم الهويه و يوقع
10- اذا كان سبب الزواج من اجنبيه سوء الحاله الصحيه يرفق تقرير طبي من مستشفى حكومي بحالته
11- تعريف سكن من العمده للطرفين

طبعا الورقه من العمده راح يسال العمده لاي غرض ف يقولوا له الزواج من اجنبيه مقيمه . 
يطلب طلبات من فاتوره مويه وكهرباء وغيرها وهذا يعتمد ويختلف من حي ل حي . عن نفسي خلصلي اياها في لحظتها. طبعا العمده راح يطلب هويتك وصوره منها .

طبعا بعد ما تجمع كل المتطلبات هذه تاخذها الى محافظة جده و تقدمها في الشباك هناك . راح يوصلك مسج على الجوال برقم المعامله . بهذا الرقم ممكن تدخل على موقع الاماره وتستعلم عن حالة المعامله . على الرابط التالي او تحمل تطبيق المحافظة على الجوال اسرع/ 

http://www.jed.gov.sa/Arabic/_layout...stInquiry.aspx

ومع كل انتقال للمعامله من اداره للثانيه راح تبان عندك في موقع المحافظة ,

بعدها ب 5 ايام  تقريبا وصلتني رساله بان المعامله تحولت الى شرطه محافظة جده ورقمها كذا . طبعا شرطه جده بعد ما تتحول المعامله ب ثلاثه او اربعه ايام روح لهم بنفسك , مكانهم في حي النسيم . لما تدخل عندهم اسال الاستقبال وقول له عندي معامله و اساله عن قسم الاتصالات . راح يسالك عن رقم المعامله وهويتك ويعطيك ورقه فيها رقم المعامله في الشرطة عشان تراجع عندهم قسم الزواج . فنفس المبنى خلف الاستقبال فيه المصاعد اطلع الدور الثاني اول ما تخرج من المصعد روح يسار في يسار بعدين روح السيب على يدك اليسار تحصل كراسي وجمب مكتب . هناك قول له اسمي كذا وعندي موعد ومعامله رقم كذا . راح يشيك على الاوراق و ياخذ منك صورة لشهادة ميلاد الخطيبة عشان يرسلوها للاحول تتصدق 
و يعطيك ورقتين الاولى الى الاحوال المدنيه والثانيه ورقة الفحص الطبي . ويطلب منك مجموعه طلبات 
1- تعريف بالراتب 
2- برنت من الاحوال المدنيه مع تعديل المهنه اذا الزم 
3- صورة بطاقتك الشخصيه
4- صوره صك الطلاق ان وجد
5- صورة الفحص الطبي مع الاصل
6- صورة اقامة المخطوبه و الاصل للمطابقه

طبعا هذه الطلبات مالها علاقه بالطلبات اللي اعطيتهم اياها قبل كذا فلازم تجيبها ثاني . اعتقد الغرض منها مقارنه المعلومات فقط .

طبعا ورقه الاحوال المدنيه تروح على الاحوال على طول بدون موعد  لطلب برنت و ايضا لتعديل المهنه اختار الفروع اللي ماعليها زحمه مثل فرع الجواد الابيض . طبعا اذا تغيرت مهنتك الحاليه عن المكتوب في نظام الاحوال فمثلا لو مسجله طالب وانت حاليا موظف لازم تغيرها من الاحوال . طبعا اول شي لازم تروح للموارد البشريه في عملك وتطلب ورقه بتغيير المهنه وتقول لهم للاحوال . راح يعطوك اياها في ظرف تاخذها وتروح على الاحوال وتخلص امورك . ضروري جدا تطلب منه يكتب على البرنت بعد ما يختم عليه ان البرنت لغرض الزواج من اجنبية.

بالنسبه للفحص الطبي 

تاخذ الورقه اللي اعطوك اياها وتروح للمركز الاقليمي  بدون موعد, طبعا مكانه في مستشفى الملك عبدالعزيز في المحجر جنوب جده .تاكد ان عندك صورتين شخصيه لك وصورتين شخصيه للمخطوبه طبعا بعد ما توصل راح يعطيك انت و المخطوبه ورقه تعبيها فيها معلوماتك بالاضافه تحدد اذا عندك اي امراض . بعدين راح يطلب منك رسوم الكشف الطبي للمخطوبه قيمته 900 ريال تدفعها كاش . بعد ما تخلص التحاليل تنتظر مده 10 ايام عمل ( لا تحسب الجمعه و السبت ) وتراجعهم وتاخذ النتائج .
 التقريرين منفصلين مو نفس لما يكون الطرفين سعوديين يجي في ورقه وحده .

طبعا بعدين تاخذ التقرير الطبي لك ولها , مع البرنت من الاحول و الطلبات اللي طلبوها الشرطه . تقدمها في نفس المكتب اللي طلبوها منك . الموظف هناك اعطاني موعد بعد اسبوعين تقريبا وقال لي اجي في اليوم الفلاني و اراجع .

بعد اسبوعين بالتمام ترحلهم وتلاقي معاملتك اتحولت للمحافظة 
تروح بعد كم يوم للمحافظة يعطيك ورقه برقم المعاملة الجديد وتراجع عن طريق الموقع نفس ما كنت تسوي في البدايه 
  وبعدها دخلت على موقع المحافظة اشيك على المعامله لقيت الحاله في قسم الزواج و تغيرت الى الاداره العامه للحقوق باجراء التأشير . بعدها بيومين شيكت وتغيرت الحاله الى انه تم تحويلها الى الاتصالات الاداريه وحالتها موقعه وفي نفس اليوم تغيرت الحاله الى "صدرت الى رئيس الدوائر النهائيه بمحكمة الاحوال الشخصيه برقم كذا .
تقريبا تاخذ منك اسبوع داخل المحافظة الى ان تتحول للمحكمة 

بعدها ب اسبوع روح للمحكمة برقم الخطاب اللي جاك في الموقع 

. راح يطلب هويتك و الفحص الطبي الاصلي لك و للمخطوبة . بعدما يراجع الاوراق راح يعطيك موعد قريب ممكن في نفس اليوم او اسبوع الى اسبوعين حسب اختيارك وتوفر المواعيد . وراح يعطيك ورقه صغيره ويطلب منك تعبي بيانات في الموقع حق وزارة العدل ويعطيك الرابط .

بواسطة (7.5مليون نقاط)
السلام عليكم ورحمة الله وبركاته
اخوي بغيت استفسر انا الان معاملتي تحولت من الامارة الى شرطة جده ورحت للشرطة قالو لي لازم تاخذ موعد على مكتب الزواج واخذت موعد وطلبو مني صورة لشهادة ميلاد المخطوبة واقامتها وبرنت من ابشر لمدى سريان اقامتها وبس هل كذا الامور ماشيه تمام ان شاء الله ولا في اشياء ثانية ؟

إجابتك

اسمك الذي سيظهر (اختياري):
نحن نحرص على خصوصيتك: هذا العنوان البريدي لن يتم استخدامه لغير إرسال التنبيهات.

اسئلة متعلقة

0 تصويتات
1 إجابة
سُئل نوفمبر 3، 2023 بواسطة Darshy (7.5مليون نقاط)
0 تصويتات
1 إجابة
سُئل أكتوبر 22، 2023 بواسطة Darshy (7.5مليون نقاط)
0 تصويتات
1 إجابة
سُئل يوليو 28، 2020 بواسطة Darshy (7.5مليون نقاط)
0 تصويتات
0 إجابة
سُئل ديسمبر 19، 2023 بواسطة Darshy (7.5مليون نقاط)
مرحبًا بك إلى مكتبة حلول، حيث يمكنك طرح الأسئلة وانتظار الإجابة عليها من المستخدمين الآخرين.
...